प्राज्ञिकद्वारा जेन जी आन्दोलनमा सरकारकाे बर्वरता पूर्ण हस्तक्षेप दमकाे भत्सर्ना

काठमाडौं, भदौ २३।  नेपाल सरकारद्वारा भदौ १६ गते फेसबुक, ट्विटर, युट्युबजस्ता सामाजिक सञ्जालमा अभिव्यक्ति स्वतन्त्रता सीमित गर्ने निर्णयप्रति प्राज्ञिक विद्यार्थी परिषद् नेपालले कडा आपत्ति जनाएको छ।

परिषद्का अनुसार GEN Z पुस्ताले सुशासन, पारदर्शिता, जवाफदेहिता र भ्रष्टाचारविरुद्धको अभियानलाई शान्तिपूर्ण ढंगले अगाडि बढाइरहेका बेला सरकारले नियन्त्रण गर्ने प्रयास गर्नु असंवैधानिक र अलोकतान्त्रिक कदम हो।

विज्ञप्तिमा भनिएको छ, “सरकारले युवाहरूको आवाजलाई दबाउने र आन्दोलनलाई रोक्नेतर्फ लाग्नुको सट्टा, उनीहरूको माग सम्बोधन गर्ने जिम्मेवारी लिन्छ भने मात्र लोकतन्त्र बलियो हुन्छ।”

परिषद्ले घटनामा संलग्न युवाहरूमाथि सरकारले गरेको दमन र प्रहरी हस्तक्षेपको पनि भर्त्सना गर्दै प्रधानमन्त्री एवं गृहमन्त्रीको तत्काल राजीनामाको माग गरेको छ।

यसैगरी, परिषद्ले GEN Z युवाहरूले उठाएका सुशासनका मागहरूलाई सम्बोधन गर्न सरकारलाई चेतावनी दिँदै आन्दोलनका कार्यक्रमहरू निरन्तर सञ्चालन गर्ने जनाएको छ। साथै, नेपाल सरकारलाई लोकतन्त्र, शान्तिपूर्ण आन्दोलन र नागरिक अधिकारको सम्मान गर्न आग्रह गरिएको छ।

प्राज्ञिक विद्यार्थी परिषद्ले विभिन्न विद्यार्थी संगठन, युवा अभियान र सचेत नागरिकसँग सहकार्य गर्दै आन्दोलनलाई अझ सशक्त रूपमा अगाडि बढाउने चेतावनी दिएको छ।