श्री सिंहदेवी मावि भाेजपुरका विद्यार्थीलाई शैक्षिक सामग्री वितरण

भोजपुर, भाद्र २२ । सेवा र विकासका लागि युवाद्वारा आयोजित तथा प्राज्ञिक विद्यार्थी परिषद्को समन्वयमा भोजपुर नगरपालिका–१ भामराङ्गमा अवस्थित श्री सिंहदेवी माध्यमिक विद्यालयमा शैक्षिक सामग्री वितरण कार्यक्रम सम्पन्न भएको छ।

शैक्षिक सहयोगमार्फत विद्यार्थीहरूको पठनपाठनमा थप सहजता पुर्‍याउने उद्देश्यसहित आयोजित कार्यक्रममा  विद्यार्थीहरूलाई विद्यालय झोला, कापी, कलम, ज्यामिति बक्स लगायतका शैक्षिक सामग्री वितरण गरियो।

समारोहमा प्राज्ञिक विद्यार्थी परिषद्का राष्ट्रिय संगठन सचिव रमेश कण्डेल, राष्ट्रिय सचिव जितेन लोहार, सगरमाथा प्रदेश अध्यक्ष इन्द्रराज राउत, केन्द्रीय सदस्य कृष्ण गिरि, विद्यालय व्यवस्थापन समितिका अध्यक्ष दिलबहादुर राई, प्रधानाध्यापक, शिक्षक संघ, अभिभावक संघ तथा वडा नं. १ का जनप्रतिनिधिहरूको उल्लेखनीय उपस्थिति रहेको थियो।

कार्यक्रममा बोल्दै वक्ताहरूले ग्रामीण क्षेत्रका विद्यार्थीहरूको शैक्षिक सशक्तिकरणका लागि यस्ता कार्यक्रमहरू प्रभावकारी हुने उल्लेख गर्दै आगामी दिनमा पनि यस्ता सहकार्यलाई निरन्तरता दिनुपर्ने धारणा राखे।

विद्यालय व्यवस्थापन समितिका अध्यक्ष र विद्यालय प्रमुखले विद्यार्थीको शैक्षिक उन्नतिमा सहयोग पु‍र्‍याएकोमा आयोजक संस्था र परिषद् प्रति आभार व्यक्त गरे।