विद्यार्थीहरूमा सूचना प्रविधिप्रतिको रुचि बढाउँदै सेन्ट लरेन्स कलेज

काठमाडौँ, चाबहिल । सूचना प्रविधिमा भविष्य निर्माण गर्न चाहने विद्यार्थीहरूलाई लक्षित गरी सेन्ट लरेन्स कलेजको आयोजनामा ‘सेप योर फ्युचर इन आइटी’ शीर्षकमा परामर्श कार्यक्रम सम्पन्न भएको छ। कक्षा १२ मा अध्ययनरत तथा हालै परीक्षा उत्तीर्ण गरेका विद्यार्थीहरूको उल्लेखनीय उपस्थिति रहेको कार्यक्रममा आइटी क्षेत्रमा करियर बनाउने अवसर, चुनौती तथा सम्भावनाबारे गहन छलफल गरिएको थियो।

कार्यक्रम सेन्ट लरेन्स स्कुल/कलेजका अध्यक्ष केशव प्रसाद दंगालको सभापतित्वमा तथा त्रिभुवन विश्वविद्यालयको सिडिसिएसआइटि विभाग प्रमुख सर्बिन सायमीको प्रमुख आतिथ्यमा सम्पन्न भएको हो। कार्यक्रममा इन्भिजन टेक प्रालिका कार्यकारी अध्यक्ष डा. पवन कुमार शर्मा, अनलिमिटेड क्लाउडका सिइओ एलेन बाइलोचन तुलाधर र इन्फाइनाइट कम्प्युटर सोलुसन्सका सिनियर इन्जिनियर सुरेन्द्र केसी अतिथिका रूपमा सहभागी थिए।

त्यसैगरी, सेन्ट लरेन्सका क्याम्पस प्रमुख पुरुषोत्तम महर्जन, प्रधानाध्यापक तारा प्रसाद सुवेदी, विभिन्न विभागका प्रमुख, शिक्षकहरू तथा विद्यार्थीहरूको उल्लेखनीय सहभागिता रहेको थियो।

कार्यक्रममा स्वागत मन्तव्य राख्दै प्रधानाध्यापक सुवेदीले विद्यार्थीहरूमा प्रविधिप्रतिको चासो र भविष्यप्रतिको विश्वास जगाउने उद्देश्यले कार्यक्रम आयोजना गरिएको जानकारी गराए। “आजको युग सूचना प्रविधिको हो। विदेश जानु मात्र विकल्प होइन, देशमै बसेर पनि सम्मानजनक करियर निर्माण गर्न सकिन्छ,” उनले बताए।

अतिथिहरूले विद्यार्थीहरूलाई व्यावसायिक अनुभव, दृष्टिकोण तथा प्रेरणादायक टिप्सहरू प्रस्तुत गर्दै आइटी क्षेत्रको सम्भावना झल्काएका थिए। सिइओ एलेन तुलाधरले “विद्यार्थीमै देशको आशा र भविष्य देखिन्छ” भन्दै आत्मनिर्भर बन्न र निरन्तर सिक्न आग्रह गरे। विदेशको आकर्षणभन्दा पनि त्यहाँको सङ्घर्ष बुझ्न आवश्यक रहेको उनको भनाइ थियो।

इन्जिनियर सुरेन्द्र केसीले नेपाली आइटी पाठ्यक्रम अन्तर्राष्ट्रिय प्रतिस्पर्धामा सक्षम रहेको उल्लेख गर्दै समस्यामुखी सिकाइ पद्धतिलाई आत्मसात गर्न प्रेरणा दिए। “आजैबाट ‘डेभलप’, ‘डेलिभर’ र ‘डिजल्भ’ को अभ्यास सुरु गर्नुस्,” उनले विद्यार्थीहरूलाई सुझाए।

डा. पवन शर्मा‌ले विषय छनोटदेखि इन्टर्नसिप र प्लेसमेन्टसम्मका विषयमा व्यावसायिक मार्गदर्शन दिँदै यस्ता परामर्श कार्यक्रमले विद्यार्थीको अन्योल हटाउन महत्वपूर्ण भूमिका खेल्ने बताए।

कार्यक्रमको विशेष आकर्षणको रूपमा आयोजित प्यानल छलफल सत्रमा विद्यार्थी र विज्ञबीच प्रत्यक्ष संवाद र प्रश्नोत्तर गरिएको थियो।

क्याम्पस प्रमुख महर्जनले कार्यक्रममा विद्यार्थीलाई आइटी क्षेत्रमा अवसर देखाउने प्रयास गरिएको उल्लेख गर्दै आगामी दिनमा पनि यस्ता कार्यक्रम निरन्तर सञ्चालन गरिने प्रतिबद्धता जनाए।

कार्यक्रमको समापन गर्दै अध्यक्ष दंगालले सूचना प्रविधिको बढ्दो महत्त्वलाई उजागर गर्दै सहभागी सबै वक्ता, विद्यार्थी तथा सहयोगीलाई धन्यवाद ज्ञापन गरे। सेन्ट लरेन्स कलेजले स्नातक तहसम्म गुणस्तरीय आइटी शिक्षा प्रदान गर्दै आएको र अनुसन्धान तथा प्रयोगमा विशेष जोड दिइने जानकारी पनि उनले दिएका थिए।