त्रिवि उपकुलपति कार्यकक्षमा नेविसंघको तोडफोड, शिक्षाध्यक्षको कार्यालयमा तालाबन्दी

काठमाडौं।नेपाली कांग्रेस निकट नेविसंघकले त्रिभुवन विश्वविद्यालयको उपकुलपति प्रा. खड्क केसी र शिक्षाध्यक्ष प्रा. दुविनन्द ढकालको कार्यकक्षमा तोडफोड र तालाबन्दी गरेका छन् ।

नेविसंघका विद्यार्थी नेताहरुले आज उपकुलपति केसीको कार्यकक्षमा तोडफोड गरेका हुन् । साथै रेक्टर ढकालको कार्यकक्षमा पनि तालाबन्दी गरेका छन् । नेविसंघले परीक्षाको बेला अनियमित विद्यार्थी भर्ना गर्न दबाब दिँदै त्रिवि पदाधिकारीहरुकाे कार्यकक्षमा ताेडफाेड र तालाबन्दी गरेका हुन् ।

त्रिविको शैक्षिक क्यालेण्डर अनुसार स्नातक तहकाे प्रथम वर्षकाे परीक्षा असारभित्र गराउनुपर्ने उल्लेख गरिएको छ ।

सोही शैक्षिक क्यालेन्डर अनुसार त्रिविले स्नातक पहिलो वर्षकाे परीक्षाका लागि फारम खुलाएको थियो । तर, नेविसंघका कार्यकर्ताहरुले भने शैक्षिक क्यालेण्डर विपरित यतिबेला विद्यार्थीको भर्ना लिन दबाब दिएकाे छ ।

शैक्षिक सत्रको अन्तिममा आएर भर्ना नलिने र क्यालेण्डर अनुसार नै शैक्षिक गतिविधि गर्ने अडान भीसी र रेक्टरले लिएका थिए । दुबैजना आफनो अडानबाट टसमस नभएपछि नेविसंघको नेताहरुले भिसीको कार्यकक्षमा तोडफोड गरेका छन् भने रेक्टरको कार्यकक्षमा तालाबन्दी गरेका छन् ।