प्रारम्भिक बालविकास सम्बन्धी अन्तर्राष्ट्रिय सम्मेलन गर्दै पूर्वाञ्चल विश्वविद्यालय

पूर्वाञ्चल विश्वविद्यालय, शिक्षाशास्त्र संकायको आयोजनामा नेपालमा प्रारम्भिक बालविकास इकोसिस्टमको परिकल्पना विषयमा दुई दिने अन्तर्राष्ट्रिय सम्मेलन हुने भएको छ । यस विषयमा नेपालमा पहिलो पटक मंसिर २१ र २२ गते विराटनगरमा अन्तर्राष्ट्रिय सम्मेलन हुने विश्वविद्यालयले जनाउको छ ।

सम्मेलनमा नेपाल, अमेरिका, मलेसिया, भारत बङ्गलादेश लगायत १५ भन्दा बढी देशका प्राज्ञ, नीति निर्माताहरू, अनुसन्धानकर्ता तथा विद्यार्थीहरूको सहभागिता रहनेछ ।

नेपालमा प्रथम पटक आयोजित यस अन्तर्राष्ट्रिय सम्मेलनमा बालविकासका क्षेत्रमा प्राज्ञिक बहस र विमर्श गराउने मुख्य उद्देश्य राखिएको छ । यस सम्मेलनमा बालबालिका लक्षित नीति, विशेष आवश्यकता भएका बालबालिकाहरूको हेरचाह, बालविकासका क्षेत्रमा आवश्यक जनशक्ति, पेसागत विकास र नैतिकता, जलवायु परिवर्तन र त्यसले बालबालिकालाई परेको प्रभाव बालबालिकाको पोषण तथा यसले बाल विकासमा पारेको प्रभाव, प्रारम्भिक बाल्यकाल विकासमा नवप्रवर्तन आदि विषयमा ४० भन्दा बढी सहभागीहरूले आफ्नो अध्ययन अनुसन्धान प्रस्तुत गर्ने कार्यक्रम रहेको छ ।

साथै यस क्षेत्रमा कार्यरत विभिन्न देशका विशिष्ट व्यक्तित्वहरूबाट प्रस्तुति तथा विविध प्रकारका कार्यशालाहरू समेत आयोजना गरिएका छन् । बालबालिकाहरूका सर्वाङ्गीण विकासका अवसरहरूको गुणस्तर र पहुँच सुधार एवं सुनिश्चित गर्ने विषयमा बहस केन्द्रित हुने विश्वविद्यालयको भनाई छ ।

सम्मेलनमा प्रस्तुत भएका कार्यपत्र एवं कार्यशालाहरूबाट विश्वविद्यालयले भविष्यमा शिक्षाशास्त्र संकाय अन्तर्गत रहने गरी इसिडी सम्बन्धी अध्ययन अनुसन्धान गर्ने केन्द्र सञ्चालनमा महत्वपूर्ण भूमिका खेल्ने अपेक्षा गरिएको छ । यस कार्यक्रमले बालविकासका क्षेत्रमा नया एवं समाजको आवश्यकता अनुसारका स्नातक, स्नातकोत्तर लगायतका विशेष कार्यक्रमहरूको पहिचान गर्न र सो अनुरूप कार्यक्रमहरू थप गर्न सघाउ पुग्ने विश्वास विश्वविद्यालयको छ ।

सम्मेलन आयोजनाका लागि काठमाडौँ महानगरपालिका, विराटनगर महानगरपालिका, नविल बैँक, प्लान इन्टरनेशनल, सेभ द चिल्ड्रेन लगायतका विभिन्न संघ संस्थाहरूको सहयोग रहेको छ । सम्मेलन कोशी प्रदेशका माननीय मुख्यमन्त्री हिक्मत कुमार कार्कीको प्रमुख आतिथ्ययतामा मंसिर २१ गते उद्घाटन हुनेछ ।