एउटै भवनमा नेपाली र विदेशी विश्वविद्यालयका कार्यक्रम सञ्चालन नगर्न सुझाब

विदेशी विश्वविद्यालयबाट सम्बन्धन लिएर नेपालमा सञ्चालन गरिरहेको कलेजहरुको नाम परिवर्तन गर्न नपाईने विज्ञ उपसमितिले सुझाब दिएका छन् । विदेशी शिक्षण संस्थाको सम्बन्धनमा उच्च शिक्षा सञ्चालन गर्ने सम्बन्धी निर्देशिका, २०५९ लाई समयानुकूल संशोधनका लागि ठोस राय सुझाव समेटी कार्यान्वयन खाकासहितको अध्ययन प्रतिवेदन पेश गर्न गठित विज्ञ उपसितिले सो सुझाब दिएको हो ।

समितिले कलेजको नाम परिवर्तन गर्न नपाइने र सञ्चालन स्थान परिवर्तन गर्दा सम्बन्धित जिल्लाबाहेक अन्यन्त्र गर्न नपाइने सुझाएको छ । साथै एउटै भवन परिसरमा एकभन्दा बढी नेपाली वा विदेशी विद्यालयका कार्यक्रम सञ्चालन गरेका कलेजलाई एक वर्ष भित्र अलग अलग स्थानमा कार्यक्रम सञ्चालन गर्न लगाउने र सो नगरेमा अनुमति खारेजीको प्रक्रियामा जाने प्रतिवेदनमा उल्लेख गरेको छ ।

दुई वा सोभन्दा बढी विदेशी संस्था वा विश्वविद्यालयबाट सम्बन्धन लिई सञ्चालन भएका कलेजलाई एक मात्र संस्था वा विश्वविद्यालयको सम्बन्धन रोज्न लगाउने र नरोजेको विश्वविद्यालयका कार्यक्रममा भर्ना बन्द गर्ने, विद्यमान निर्देशिकामा विदेशी संस्था वा विश्वविद्यालय भनिएकोमा नयाँ बन्ने ऐन वा निर्देशिकामा विदेशी विश्वविद्यालयमात्र उल्लेख गर्ने र विश्वविद्यालयबाहेकका अन्य संस्थाबाट सम्बन्धन वा अनुमति लिई सञ्चालनरत कलेजलाई एक वर्षभित्र विश्वविद्यालयको सम्बन्धनमा जानु पर्ने अनिवार्यता कायम गर्ने, मन्त्रालयले अनुगमन संयन्त्र बनाई वार्षिकरूपमा अनुगमन गरी पूर्वाधार पूरा गरेका र नगरेका कलेजहरूको नामावली प्रकाशन गर्ने र पूर्वाधार पूरा नगरेकालाई एक वर्षको समय दिई पूर्वाधार पूरा गर्न लगाउने लगायतको सुभाब प्रतिवेदनमा छ ।

त्यसैगरी प्रत्येक कलेजले छुट्टा छुट्टै डेडिकेटेड पूर्णकालीन प्रिन्सिपलको व्यवस्था गर्नु पर्ने अन्यथा गरेकोमा कारबाही गर्ने, हरेक कलेजले मन्त्रालयले उपलब्ध गराएको ढाँचामा वार्षिक प्रतिवेदन तयार गरी मन्त्रालय समक्ष माघ महिना भित्र पेस गर्नुपर्ने, यस विज्ञ उपसमितिको प्रतिवेदन तथा यस अगाडि भएका विभिन्न समिति तथा कार्यदलको प्रतिवेदनमा भएका सिफारिसका आधारमा नयाँ ऐन वा निर्देशिका बनाई यी कलेजहरूको अझ प्रभावकारी रुपमा नियमन तथा व्यवस्थापन गर्नुपर्ने भनिएको छ ।

हेर्नुहोस प्रतिवेदन