१५ कराेड भन्दा बढि छात्रवृत्ति प्रदान गर्दै भक्तपुरको नेपाल इन्जिनियरिङ कलेज

 काठमाडौँ । भक्तपुरको चाँगुनारायण नगरपालिकास्थित नेपाल इन्जिनियरिङ कलेजले वार्षिक १५ करोड रुपैयाँ बराबरको छात्रवृत्ति प्रदान गर्ने भएको छ ।

कलेजले बिहीबार काठमाडौँमा पत्रकार सम्मेलन गरेर जेहन्दार विद्यार्थीलाई छात्रवृत्ति प्रदान गर्दै आएको र यस वर्ष पनि उक्त छात्रवृत्तिलाई निरन्तरता दिने जानकारी दिएको हो । विश्वविद्यालयको १० प्रतिशत छात्रवृत्तिसँगै वडा, नगरपालिका छात्रवृत्ति, प्रादेशिक छात्रवृत्ति, कलेज टपर छात्रवृत्ति, सेमेस्टर टपर छात्रवृत्ति समेत प्रदान गर्दै आएको कलेजका प्राचार्य दुर्गाप्रसाद भण्डारीले जानकारी दिए । यी सबै गरेर करिब ७० जनाले छात्रवृत्ति पाउने गरेको जनाइएको छ ।

पैसाका अभावकाे कारण इन्जिनियरिङ पढ्ने अवसरबाट बञ्चित नगर्न चाँगुनारायण नगरपालिकाकाले समेत बजेटकाे व्यवस्थापन गरेको कलेजका अध्यक्ष समेत रहेका नगर प्रमुख जीवन खत्रीले जानकारी दिए ।

कलेजका सहायक प्राध्यापक यमकृष्ण पौडेलले पोखरा विश्वविद्यालयले केही समय अगाडिमात्रै पाठ्यक्रमहरू समय सापेक्ष संशोधन गरिसकेको बताए । नेपाल इन्जिनियरिङ कलेजले पोखरा विश्वविद्यालयबाट सम्बन्धन प्राप्त गरेको छ ।

‘इन्जिनियरिङ विधाका सबै पाठ्यक्रमहरू विश्वव्यापी एकरूपता हुन्छ,’ उनले भने, ‘नेपालमै इन्जिनियरिङ गरेका विद्यार्थीहरू विश्वका धेरै देशहरूमा प्रतिष्ठित कम्पनी र क्षेत्रमा सफलतापूर्वक अगाडि बढिरहेको प्रशस्त उदाहरण छन् ।’

कलेजले स्नातक तहतर्फ ६ वटा विषय र स्नातकोत्तर तहतर्फ ४ वटा विषय अध्यापन गराउँदै आएको छ । स्नातक तहमा बीई सिभिल इन्जिनियरिङ (१४४ सिट), बी आर्किटेक्ट (४८ सिट), बीई सिभिल एण्ड रुलर इन्जिनियरिङ (४८ सिट), बीई कम्प्युटर इन्जिनियरिङ (९६ सिट), इलेक्ट्रिकल एण्ड इलेक्ट्रोनिक्स इन्जिनियरिङ (४८सिट), इलेक्ट्रोनिक्स एण्ड कम्युनिकेशनमा (४८ सिट), बीई सिभिल फर डिप्लोमा होल्डर्स (४८ सिट) सम्बन्धी अध्यापन हुँदै आएको छ ।

त्यस्तै स्नातकोत्तर तहतर्फ कन्स्ट्रक्सन म्यानेजमेन्ट, इन्टरडिस्प्लीनरी वाटर रिसोर्स म्यानेजमेन्ट, नेचुरल रिसोर्स म्यानेजमेन्ट र ट्रान्सपोर्टेशन इन्जिनियरिङ म्यानेजमेन्ट सम्बन्धी अध्यापन हुँदै आएको छ । सो इन्जिनियरिङ कलेजमा हरेक वर्ष स्नातक तहमा ४८० जना विद्यार्थी र स्नातकोत्तर तहमा १५० विद्यार्थीहरू भर्ना हुने गरेका छन् ।

मुनाफारहित सामाजिक शैक्षिक संस्थासमेत रहेको कलेजले आफ्‌नै करिब २०० रोपनी जग्गामा पूर्वाधार बनाएको छ । १२३ जना पूर्णकालीन शिक्षक/कर्मचारी रहेको उक्त कलेजमा इन्जिनियरिङ विधाका सबै पाठ्यक्रम र रिसोर्सयुक्त आधुनिक पुस्तकालयसमेत छन् ।

अत्याधुनिक ल्याब, आइटी सेन्टरको व्यवस्था, सहरी कोलाहलदेखि मुक्त शान्त तथा हरियाली वातावरण अत्याधुनिक प्रविधि, प्रयोगात्मक शिक्षण विधि र राष्ट्रिय तथा अन्तर्राष्ट्रिय रिसर्चका लागि पहुँचसमेत रहेको कलेजले जानकारी दिएको छ ।

कलेजले युरोप, जापान, भारत लगायत देशका विभिन्न कलेज र विश्वविद्यालयहरूसँग शिक्षक विद्यार्थी एक्सचेञ्जको अवसर दिदै आइरहेको बताएको छ ।