झण्डै दुई महिनापछि खुल्यो नेपाल संस्कृत विश्वविद्यालयको ताला

नेपाल संस्कृत विश्वविद्यालयमा लागेको ताला ५५ दिनपछि खुलेको छ। स्वतन्त्र विद्यार्थी युनियन केन्द्रीय आयुर्वेद विद्यापीठले केन्द्रीय कार्यालयमा गत असार ३ गते लगाएको ताला ५५ दिनपछि शुक्रबार खुलेको हो।

विश्वविद्यालयका उपकुुलपति प्रा.डा. यादवप्रकाश लामिछाने, शिक्षाध्यक्ष प्रा.डा. भिम खतिवडा, कुलसचिव सहप्राध्यापक माधव अधिकारीसहित कर्मचारीको उपस्थितिमा ताला खुलेको हो। उक्त अवसरमा स्वतन्त्र विद्यार्थी युनियनका अध्यक्ष हेमन्त बञ्जाडेले विद्यार्थीका माग पूरा गरिदिएकोमा विश्वविद्यालयप्रति आभार प्रकट गरे।

इन्टर्नसिप भत्ता वृद्धिको माग गर्दै ताला लगाएको स्ववियुले आफ्ना माग पूरा भएको जनाउँदै ताला खोलेको हो।

विश्वविद्यालयद्वारा गठित वार्ता टोलीका संयोजक आयुर्वेद अध्ययन संस्थानका डीन प्रा. डा. चन्द्रप्रसाद भुसालको अध्यक्षतामा भएको वार्ताले नेपाल संस्कृत विश्वविद्यालयको अधिकृत स्तरको सुरुवाति तलबको ५० प्रतिशत बराबरको इन्टर्नसिप भत्ता प्रदान गर्ने सहमति भएको विश्वविद्यालयको वार्ता टोलीका सदस्य सचिव अनिल पोख्रेलले जानकारी दिए। उनका अनुसार निर्णय २०८० साउनदेखि लागु हुनेछ।

विश्वविद्यालयका उपकुलपति प्रा.डा. यादवप्रकाश लामिछानेले विश्वविद्यालयलाई तालाबन्दीमुक्त गर्ने कार्यमा सहयोगी बनिदिन आह्वान गरे।

नेपाल संस्कृत विश्वविद्यालय सेवा आयोगमा नेपाल विद्यार्थी संघ दाङले गत असार ९ गते लगाएको ताला अझैं खुल्न सकेको छैन। ताला नखुल्दा विश्वविद्यालयले सञ्चालन गर्नेने कर्मचारी, उपप्राध्यापक, सहप्राध्यापकका परीक्षा अनिश्चित हुँदा एक हजार बढी परीक्षार्थी मर्कामा परेका छन्।